Kolmas teedüskiri, radokuu 2025

Hääq kolleegiq!

Seon kolmandan kirän om tähtsä teedüs CIFU 14le kirjäpandmisõ kotsilõ. Hääs kitetüide teemasektsiuunõ ja vasta võetuidõ ettekandidõ nimekirjä, sammamuudu ka teedüst kutsutuidõ ettekandjidõ kotsilõ ja kavaplaani edimäst variantsi saa nätäq aadrõsi https://cifu14.ut.ee/programme/ päält. Üttekokko tulõ kooniq 8 paralleelsektsiuuni ja kava plaanitas päämädselt 30-minodiliidsi mulkõ perrä (20 minotit ettekandõ jaos, 5–7 minotit arotusõ jaos ja 3–5 minotit ruumõ vaihõl liikmisõs). Kõigih ettekandõtarrih om puutrõ üten Interneti ja pildinäütäjäga. Ku sul om ettekandõ jaos vaia midägi viil, olõq hää ja kirodaq meile inne kongressi. Järgmäidsi kuiõ joosul vahtsõndõdas ütesttüküst veebilehte ni pandas üles vahtsõmbat teedüst kava kotsilõ.

Hindä kongressile kirjäpandmisõs lövvät kirjäpandmisvormi aadrõsi https://cifu14.ut.ee/registration/ päält. Vormi täütmise aigu unõhtagu-iq, et mi ei saaq kongressile lupaq Vinnemaa ja Valgõvinne asotuisiga köüdetüid ettekandit. Sääntsel johtumisõl (ja ka sis, ku sa ei olõq köüdet ütegi asotusõga), panõq asotusõ asõmal vormi kirjä liin.

Ku su ettekannõq ei olõq inglüse keelen, pallõmiq nimmadaq, mis keelen taa om. Panõq tähele, et teemasektsiooni ettekandõ kiil tulõ kokko leppiq teemasektsiooni kõrraldajidõga. Üldsektsiooni ettekandõ keele saa kõnõlõja esiq otsustaq. Siski soovitamiq muun ku inglüse keelen ettekandõlõ tetäq inglüskeelidseq slaidiq. Ku su ettekannõq om inglüse keelen, aq slaidiq ommaq mõnõn muun keelen, sis tuud ei olõq vaia kirjäpandmisvormin nimmadaq.

Hindä varra kirjä pandja jaos om osavõtmismass 250 eurot paiga pääl ossa võtmisõ ni 100 õnnõ võrgon ossa võtmisõ kõrral. Varanõ kirjäpandminõ om vallalõ urbõkuu 1. pääväst kooniq mahlakuu 30. pääväni. Päält tuud om osavõtmismass 300 eurot paiga pääl / 150 eurot võrgon ossa võtmisõs. Ku tahat mõnost huvikäügist ossa võttaq, tulõ hinnäst kirjä pandaq ildampa piimäkuu 1. pääväs. Pallõmiq kõigil ettekandjil hinnäst kirjä pandaq ildampa piimäkuu 30. pääväs. Panõq tähele, et mi ei panõq su ettekandõ abstrakti kodolehepääle inne, ku olõt hinnäst periselt kirjä pandnuq, tuu tähendäs, et olõmiq ka su osavõtmismassu kätte saanuq. Ku tahat hinnäst kirjä pandaq päält piimäkuu 30. päiväq, olõq hää ja kirodaq kongressi kõrraldajilõ. Osavõtmismassu seen ommaq kongressi matõrjaaliq, kohvipausiq ja õdagudsõq sündmüseq.

Mi pallõ teedäq andaq, kas tulõt katõlõ vastavõtulõ: tõsõpäävä, põimukuu 19. ja neläpäävä, põimukuu 21. pääväl. Naaq ommaq osavõtumassu seen, aq mi tahassi nailõ tulõjidõ hulka ette teedäq. Üteliidsi valiq hindäle ka giidiga liina piten käümine neläpäävä (21.08) päältlõunat ja huvikäük puulpäävä (23.08). Liina piten käümiisi ja huvikäüke kotsilõ saat inämb lukõq lehe https://cifu14.ut.ee/excursions/ päält.

Viimädses pallõmiq sul, ku sa võtat ossa paiga pääl, teedäq andaq, määntsil päivil sa kongressil olõt, et mi saassiq kohvipausõ häste plaaniq (kohvipausiq ommaq osavõtmismassu seen).

Ku sul om viisa jaos kutsõt vaia, sis olõq hää uuriq vällä, midä saatkunnan nõvvõtas, ja kirodaq meile aadrõsi cifu14@ut.ee pääle. Vinnemaa ja Valgõvinne kodanigõlõ saa-iq viisakutsõt andaq. A võrgon ommaq ka naidõ riike inemiseq oodõduq kongressist ossa saama.

Päält kirjäpandmisvormi ärsaatmist saadõtas sullõ e-kiräga kinnütüs, kon pääl om ka kokkovõtõq tuust, midä kirjäpandmisõ aigu valõt. Sääl kirän om ka osavõtmismassu lehe link: https://cifu14.ut.ee/payment-options/. Sääl om tuud kogo teedüs masmisõ kotsilõ, olõq hää ja tallidaq tuu perrä. Ku ütśki tuuduist võimaluisist passi-i sullõ, panõq hinnäst iks kirjä ärj ja kirodaq meile: cifu14@ut.ee.

Kongressi päämäne kotussõq ommaq Tarto Ülikooli humanitaarvaldkonna maja aadrõsi Jakobi 2 pääl ja tuu kõrval olõja maja aadrõsi Lossi 3 pääl (sinnäq päses ka Jakobi 2 seest). Kongressi vallategemine om aadrõsi Vanemuise 46 pääl ja õdagudsõq vastavõtuq ülikooli aoluu muuseumin (Lossi 25) ja Eesti Rahva Muuseumin (Muuseumi tee 2). Kongressi pidämise kotussidõ lähkün om hulga esi hinnaklassiga restoraanõ ja kohvitarri. Ütist lõunõsüüki ei kõrraldada.

Päävaŕo löüdmises olõmiq tennüq nimekirä hotellest, kon olõmiq ette kinniq pandnuq kotussit kongressi osaliisi jaos ja/vai kon kongressi osaliisi jaos ommaq odavambaq hinnaq: https://cifu14.ut.ee/accommodation/. Soovitamiq kotussõq kinniq pandaq nii varra, ku saat.

Kõik abstraktiq pandas üles kongressi võrgolehe pääle. Paprõ pääl abstraktiraamatut ei tetäq, sammamuudu ei tulõq kongressi ettekandidõ välläannõt. Siski kutsumiq teemasektsiuunõ korraldajit tegemä ummi välläandõplaanõ.

Oodamiq teid põimukuun Tartohe!

Gerson Klumpp
XIV Soomõ-Ugri Kongressi president´

Marili Tomingas
XIV Soomõ-Ugri Kongressi sekretäŕ